Тус Холбоо нь байгуулагдсан цагаасаа япон хэлний сургалт судалгаа, сурах, сургах арга зүйг чанарын түвшинд хөгжүүлэх, сурах бичиг зохиох, багш нарын мэдлэгийг дээшлүүлэх, олон улсын гадаад хэлний сургалтын ололт дэвшлээс суралцах, өөрсдийн ололт амжилтаа мэдээлэх солилцох зэрэг зорилгын хүрээнд бүхий үйл ажиллагаагаа чиглүүлж ирлээ.

1995 оноос хүүхэд залуучуудын япон хэл сурах сонирхлыг нэмэгдүүлэх, япон орны талаар улам илүү ойлгох, хэлний мэдлэг чадварыг нь хөгжүүлэх зэрэг зорилгоор Монгол улсад суугаа Япон улсын Элчин Сайдын Яамтай хамтран “Японоор хэн сайн ярих вэ” уран илтгэлийн уралдааныг зохион байгуулж эхлэв.
2000 оноос Япон улсын Япон сангийн дэмжлэгтэй "Япон хэлний мэдлэгийн түвшин тогтоох шалгалт"-ыг зохион байгуулж эхлэв.
2002 оноос JASSO байгууллагатай хамтран "Хувийн зардлаар Япон улсад суралцах шалгалт"-ыг өөрийн оронд зохион байгуулах болов.
2007 оноос Улаанбаатар хот болон хөдөө орон нутгийн япон хэлний багш нарыг хамруулсан “Япон хэлний боловсрол" сургалт судалгааны олон улсын симпозиумыг тогтмол явуулах болов.
2007 оноос япон хэлний сургалт, судалгааны ажлыг тогтворжуулах зорилгоор Монголын япон хэлний багш нарын холбооны дэргэд “Япон хэлний сургалт судалгааны баг” байгуулан сар тутам бүхий л шатанд япон хэл зааж буй багш нар өөрсдийн сургалт, судалгаатай холбоотой асуудлаар хэлэлцэн санал солилцдог болов.

2007 оноос тухайн жилийн ажлын тайлан болгон “Нихонго но хироба” эмхэтгэлийг хэвлэн гаргах болов.
2014 оноос бусад олон гадаад хэлний мэргэжлийн хүмүүстэй уялдаа холбоогоо хөгжүүлэх, мэдээлэл солилцох үүднээс "Япон хэлний боловсрол" мэргэжлийн эрдэм шинжилгээний сэтгүүл хэвлүүлэн нийтийн хүртээл болгож байна.
2000-2004 оны хооронд монголын ерөнхий боловсролын суралцагчдад зориулсан "Би чадна" япон хэлний сурах бичгийг тус холбооноос эрхлэн гаргасан.
2011 онд Япон улсын Япон сантай хамтран “JF Япон хэлний боловсролын стандарт 2010”-ыг монгол хэлнээ хөрвүүлэв.
2015 онд Монгол суралцагчдад зориулан япон хэлний стандартад тулгуурласан “Дэкирүмон” цуврал 5 дэвтэр сурах бичгийг бага, дунд, дээд сургуулийн япон хэлний багш нарын баг Япон сангийн мэргэжилтний оролцоотой амжилттай хэвлүүлэв.

Монгол улсад суугаа Япон улсын Элчин сайдын Яам, Монгол-Японы хүний нөөцийн хөгжлийн төв, Монгол-Японы худалдааны нийгэмлэг, Япон иргэдийн нийгэмлэг болон Нийслэлийн боловсролын газар, их, дээд, дунд сургуулиудтай хамтран ажилладаг.